Жаңабай Баймуратов

Жанабай Баймуратов:
ЕРТЕҢ ОН БЕСИНДЕ ЗҮРӘӘТ
БАЙРАМЫ

Жыйнастырып дийханшылық ҳасылын ,
Қызғын мийнет болып өтти майданы .
Әзийз халқым ушын қуўанышлы күн ,
Ертең он бесинде зүрәәт байрамы !

Пахта , салы , бийдай еккен мәртлерим ,
Балықшы , шарўасы бәрин епледиң .
Бағманы , тамыршы барын шөпледиң ,
Ертең он бесинде зүрәәт байрамы .

Бийик зәўлим жайлар көкке тийип тур ,
Сениң мәртебең ғой көптен бийик дур .
Қурылысшым , жайың аспан сүйип тур ,
Ертең онбесинде зүрәәт байрамы .

Жеңил , аўыр санаттың түри көп ,
Карханалар көзге түсер ири көп ,
Жәриялады ҳәммеңизге байрам деп ,
Ертең он бесинде зүрәәт байрамы .

Атлар шабысады узақ айлаўға ,
Палўанлар тайын тур белбеў байлаўға .
Қарақалпақтың келиң тойын тойлаўға ,
Ертең он бесинде зүрәәт байрамы .

Жаңабай Баймуратов
Қанлыкөл.

Темаға :

ЎАҚЫТ – ДЕГЕН ДАЎАСЫ БАР
ҲӘР ИСТИҢ

Мейли жүгиребер , жетпекши болып ,
Секир , аспанға уш барында күштиң .
Биреўден алдын бол , биреўден қалып ,
Ўақыт деген даўасы бар ҳәр истиң .

Қанша талпынсаңда ўақты сәти бар ,
Питпегенде сен нелерге еристиң .
Адамға берилген ,, әўмет ” аты бар ,
Ўақыт деген даўасы бар ҳәр истиң .

Саған берген менен тилләли тақты ,
Әўметин бермесе алға жүристиң .
Қолыңды мың бир соз , болмаса бахты ,
Ўақыт деген даўасы бар ҳәр истиң .

Кисини қызғанып күстәни етпе ,
Қәлбиң дүзеп жолынан жүр дурыстың .
Илесип кейнинен кетпе өсектиң ,
Ўақыт деген даўасы бар ҳәр истиң .

Аспанға балта ат , қайтпайды саған ,
Жолынан мейли жүр таныс – билистиң .
Шөплесең берилген ырысқы тағам ,
Ўақыт деген даўасы бар ҳәр истиң .

Бәриде өтеди саўлы – наўқаслы ,
Жағдайыңа қарай күнди көристиң .
Тегинге пәмсиздей жасама жасты ,
Ўақыт деген даўасы бар ҳәр истиң.

Жаңабай Баймуратов .
Қанлыкөл.

Күн темасына :

МҮСӘПИР

Үйим жайым машқаласы таўсылмас ,
Жүгире бер , жоқты сирә бар қылмас .
Соның ушын тегин адам умтылмас ,
Негизинде соннан шығар мүсәпир .

Иләжиң жоқ қарыздарсаң таппаўға ,
Қалалы жер я малың жоқ сақлаўға .
Нийет етип бир қәдемди атлаўға ,
Сырт еллерде пайда болар мүсәпир .

Өзиң хожалыққа жай салыў керек ,
Азғантай өзгерис байқалыў керек .
Несийп етсин дейсең ақ жүзли келмек ,
Сол жақта тайындай ойлар мүсәпир .

Сөйтип жүргениңде ул – қыз ержетип ,
Тойды бериў керек оған гүрлетип .
Контракт төлейсең гейде бир кетип ,
Бәрине қайылдай болар мүсәпир .

Өмириң өтеди басқа еллерде ,
Бирақ бир күн келер бахыт демлерде .
Аўырсаң пул болмай қалар емлерге ,
Сырт еллерде аман жүрсин мүсәпир .

Дәўир сондай болып кетти көплерге ,
Мүсәпирлик сиңип дене етлерге .
Пайда көрип биреў ,, апар – ап келге “
Көп қыйналып қалды бираз мүсәпир .

Алданып шырмалып биреў торына ,
Қуўанасаң тирилиги барына .
Кетти қарамастан сәўер ярына ,
Қайтып келе алмай олда мүсәпир .

Йгри жолдан жүрип барған жағында ,
Жүргендей тап рәҳәттиң бағында .
Ҳәмде қосылысып басқа ағымға ,
Елине қас болған олда мүсәпир .

Мүсәпирлик аямайды адамды ,
Гейде зар жылатар бала – шағаңды .
Сезе ғойсаң жақсы менен жаманды ,
Қашып қутыл жаман жерден мүсәпир .

Үлкен байлық ушын берилме ойға ,
Қызықпа көз – көзли сарайдай жайға .
Сондада жеткерер сени де тойға ,
Өз елиңде мийнет исле мүсәпир .

Қанша қурылыслар қурдың сырт елде ,
Жас жигитлик күш – қуўат барында белде .
Усы хызметлерди еткенде елге ,
Қандай жақсы болар еди мүсәпир.

Жаңабай Баймуратов
19 12 2024 ж.

КИМ ӨЗ ҮЙИНДЕ БАХЫТЛЫ БОЛСА , БАХЫТЛЫ СОЛ
Темаға.

Шүкир деймен бахытлыман ,
Жақсылыққа берилсе жол .
Ден саўлыққа жетпейди ҳеш,
Бахыт деген тек әне сол !

Тамағым тоқ кийим пүтин ,
Зайып , ул – қыз жақсы күтим .
Күнде қонақ ҳал сораған ,
Әне бахыт келим – кетим.

Ақлықларым ойнап күлсе ,
Атажан деп танып билсе .
Мениң бахтым үйимдеги
Кишкенеси тәй – тәй жүрсе .

Келген ўақта қушақ ашар ,
Атажан деп тарпа басар .
Бахтым мениң ошақ басым ,
Келин хызмети жарасар .

Ата – анам солай оқытты ,
Үйдеги берди тахытты .
Ким үйинде бахытлы болса ,
Әне сол адам бахытлы .

Жаңабай Баймуратов
Қанлыкөл.

ТАҢНЫҢ АЛДЫ

Қараңғы…тынышлық ,тым – тырыс дала ,
Текте үрип атыр бир – еки күшик .
Аспанда жулдызлар жанар тек ғана ,
Жерде , ызғар яңлы шық – қыраў түсип .

Тереклер мүлгип тур , ўйқы басқандай ,
Суўық еңсесинен бүрип қысқандай .
Тып тыныш әтирапты бузып жиберди ,
Бир қораз қышқырар уйқы ашқандай .

Демек таң қалыпты дедим жақынлап ,
Тоңыппан далада бираз салқынлап .
Ҳәм сөйленип әсте кирдим үйиме ,
,, Не бар екен — азан менен қақылдап “

Жарықты өширдим , қапыны жаптым ,
Ҳәмде уйықлап атқан орныма жаттым .
Таң алдында әжеп сондай көринис,
Тамаша қылыўға бир ўақыт таптым.

Жаңабай Баймуратов
Түнги саат 4…17..

Сырға салыў үлкен тойға айланды ( ҳәзил ).

Ер жеткен қыз қысынғаннан қыя тур ,
,,Не болар “- деп түри өзгерип сыя түр .
Қуда болмыш үш – төрт ,, дамас” киятыр ,
Сырға салыў үлкен тойға айланды .

Қойды сойып қуйрық майы батпандай ,
Төсек салып бир созылып жатқандай .
Тап сол қыздан қутылалмай атқандай ,
Сырға салыў үлкен тойға айланды .

Әўел аўдаңласып түсер қудағай ,
Үсип келер дуў сыйыңа қарамай .
Қуда түсер…көп екенғой жораң ..ай ,
Сырға салыў үлкен тойға айланды .

Бурын еки – үш ҳаял кеп кетер еди ,
Қулағын балаға тислетер еди .
Не қойсаң алдына жеп кетер еди ,
Сырға салыў үлкен тойға айланды .

Иште дастурханның кемис жери жоқ ,
Келгенниң де оны таўсар ҳалы жоқ .
Таўық , балық тағамның ғой саны жоқ ,
Сырға салыў үлкен тойға айланды.

Қуўырдақ жегизип , гүртикте жилик ,
Қуда күткен яңлы шаўқымлы күлип .
Енди гәп тыңлаймыз қулақты түрип ,
Сырға салыў үлкен тойға айланды .

Сырға салса қызды сақлаў қыйындай ,
Сол сырғасы жүдә қымбат буйымдай ,
Бий абырай етпе ертең тойында..ай..
Сырға салыў үлкен тойға айланды.

Сарпайды әкелип жаўып молынан ,
Шықпаймыз ғой ескилердиң жолынан .
Сөйтип қызды услатамыз қолынан ,
Сырға салыў үлкен тойға айланды .

Дәстүр даўам етер пайда болмағы ,
Ойлап ислемеген дәстүр қалмады .
Жоқлаў хожалыққа түсер салмағы ,
Сырға салыў үлкен тойға айланды.

Жаңабай Баймуратов.